Aktuelle arbeidsstader
Som signalmontør kan du få jobb i jernbane- og sporvegsbedrifter.
Sentrale arbeidsoppgåver
Ein signalmontør arbeider med vedlikehald, feilretting og montering på ulike typar signalanlegg for jernbane og sporvegar. Han/ho held ved like alle typar signalanlegg som har straumforsyningsanlegg med spenningar på opptil 1000V vekselspenning og 1500V likespenning. Signalmontøren arbeider både innandørs og langs bane eller linje. Arbeidsoppgåvene er i hovudsak
- montering, vedlikehald og feilretting på relébaserte og elektroniske sikrings- og vegsikringsanlegg
- montering, vedlikehald og feilretting på utstyr for automatisk togkontroll (ATC)
- arbeid på fjernstyrings- og manøversystem for sikringsanlegg
- legging og skøyting av kablar i jord, montering av kablar i utstyr, koplingsskap og tekniske rom
- montering, vedlikehald og feilretting på mekanisk og elektromekanisk utstyr i og ved sporet
Personlege eigenskapar
Signalmontøren må samarbeide med fleire faggrupper ettersom systema for jernbane- og sporvegsdrift grip tett inn i kvarandre. Derfor er det store krav til teknisk innsikt, nøyaktigheit, samarbeid og fleksibilitet. Signalmontøren arbeider til tider under sterkt tidspress og må derfor kunne tole stress.
Formelle krav
Det stillast spesielle helsekrav, m.a. til hørsel, syn og fargesyn.
Kilde: vilbli.no